Primavera Europea

Castellano · Valencià / Català · Galego · Euskara · Aragonés · Asturianu · Aranés · English
Firma

POR UNA EUROPA DE LES PERSONES

Construyir la Europa de les Persones ye posible.

Pa ello, dende'l Sur d'Europa queremos terminar colos retayos y que paguen los responsables d'esta gran estafa. Impuestu por una élite política y económica, l’austericidiu emprobez a millones de persones ya hipoteca’l futuru de les xeneraciones vinientes. Esta Europa de la Troika ye cada vez más desigual y insostenible, y lleva, por desgracia, a que cada vez más xente pierda l'enfotu nel proyectu européu.

Nel Estáu español vivimos de forma entá más crítica esta nefasta dinámica col drama del paru, la esclusión social o la probeza enerxética, según los vergoñosos casos de corrución. Amás, dende la reforma de la Constitución Española de 2011, priorízase'l pagu de la delda primero que cualquier inversión social y ecolóxica. Por si fora poco, asistimos tamién a la vuelta a un Estáu centralista y autoritariu, qu'adopta les sos decisiones nos niveles más alloñaos posibles de la ciudadanía, negando la so plurinacionalidá y retayando democracia y autogobiernu.

Sicasí, nun mundu globalizáu ya interdependiente, nunca precisáramos tantu a Europa. Ello ye que la Unión Europea ye un de los espacios clave pa lluchar contra les grandes corporaciones y los mercaos financieros, el cambéu climáticu y los populismos xenófobu y escluyente.

Por eso nun mos resignamos y pasamos a la ofensiva. Como ciudadanía, queremos reinventar Europa dende la solidaridá, la democracia y la sostenibilidá. Queremos recuperar la nuesa soberanía política y exercela a nivel supranacional pa consensuar un nuevu horizonte de vida digna y responsable. Queremos apurrir respuestes válides pa la mayoría de les persones y acordes coles llendes del Planeta.

Somos la Europa de les persones qu'amen a la so redolada y quieren sostenibilidá y solidaridá pa güei y mañana, nos países del Norte y del Sur. Somos la Europa de los pueblos que quieren compartir valores, cooperar pa espolletar y conxugar la diversidá llingüística y cultural nun proyectu común de dignidá, paz y bienestar.

Dende la firme voluntá democrática, la defensa de los derechos y llibertaes, la dignidá de les persones y los pueblos, la xusticia social y ambiental, vamos cooperar pa faer posible una PRIMAVERA EUROPEA.

#RESCATEMOSPERSONES

Vamos rescatar persones. Pa ello queremos polítiques dotaes d'inversiones pa la creación d'empléu nuna economía al serviciu de les persones y respetuosa col mediu ambiente. Apostamos pola tolerancia cero contra la corrupción, el fraude, el fuximientu fiscal y los paraísos fiscales.

#DEMOCRACIAREAL

Queremos abrir un nuevu procesu constituyente européu escontra una Europa de les Persones y de los Pueblos más democrática y tresparente. Queremos más poder pal Parlamentu Européu, la institución con más llexitimidá ciudadana dientro de les instituciones europees. Queremos tresparencia nel funcionamientu de la UE, y que tea al serviciu de la ciudadanía.

#SOLIDARIDÁ

Reclamamos una nueva Carta de los Derechos Sociales pa garantizar educación, sanidá, xusticia y mediu ambiente pa toes y toos, incluyíes les persones migrantes. Priorizamos la llucha contra la probeza y l'esclusión social y reclamamos l'apertura d'un alderique européu sobre la renta básica de ciudadanía.

#EUROPADELOSPUEBLOS

Reivindicamos la Europa de los Pueblos, y el sofitu y respetu de la UE a la so diversidá nacional, cultural y llingüística, incluyendo les minoríes y naciones ensin Estáu. Refugamos el retayu a la so autonomía y procesos de decisión democráticos y reclamamos la participación real y efectivo de les unidaes subestatales en tomar de decisiones europees, con especial atención a les Rexones Europees Ultraperifériques dotándoles de la so propia circunscripción electoral.

#DERECHOS

Reivindicamos un espaciu de llibertá y seguridá pa toles persones, llibre de discriminación, racismu y xenofobia. Güei queremos defender y conquistar igualdá de derechos pa les muyeres y pa los colectivos marxinaos sían LGTB+, persones mayores, con diversidá funcional, etc. La Europa que queremos defende tamién los derechos dixitales, la neutralidá y privacidá de la rede.

#ECONOMÍAVERDE

Apostamos pola transición ecolóxica de la economía (New Deal Verde) escontra otru modelu granible y de consumu basáu na economía social, sostenible y del bien común, ye dicir una prosperidá compartida. Vamos Financiar la creación d'empleos verdes y decentes, amás d'I+D+i, con una reforma fiscal que tase primero de too los recursos y los capitales.

#MOCEDÁCONFUTURU

Una Europa que de respuesta y horizontes de futuru a los pruyimientos vitales de la so xeneración meyor preparada y nun la condergue a la diáspora, que de soluciones al drama del paru xuvenil con una dotación de fondos abondos a la Garantía Xuvenil Europea y les polítiques d'emancipación.

#NUNDEBEMOSNUNPAGAMOS

Esiximos una auditoría pública y ciudadana de la delda, que dexe evaluar la parte ilexítima de la mesma y refugue el so pagu. Lluchamos por una nueva gobernanza económica de la UE, la democratización del Bancu Central Européu y una harmonización fiscal europea. Proponemos una tasa a les transacciones financieres internacionales pa evitar la especulación y financiar la solidaridá internacional.

#EUROPASOSTENIBLE

Proponemos un nuevu modelu enerxéticu européu, llibre d'enerxíes fósiles y nuclear, ensin fracking y basáu nes enerxíes anovables y l'autosuficiencia. Lluchamos por una Europa a la vanguardia contra'l cambéu climáticu, garante del respetu a la biodiversidá, el bienestar animal, la nueva cultura de l'agua y con polítiques agrícoles y pesqueres ambiental y socialmente xustes.

#FRATERNIDÁGLOBAL

Queremos convertir a la UE nuna voz internacional fuerte y unitaria na defensa de la solidaridá, la llibertá y los derechos humanos, la erradicación de la probeza y la dignificación de la migración interna y esterna. Tenemos De amenorgar el gastu militar y promover la seguridá humana y la promoción de la paz.


Primavera Europea ye una iniciativa conxunta de

Coalició Compromís EQUO Chunta Aragonesista Democracia Participativa Por un mundo más justo Partido Castellano Coalición Caballas Coalición Caballas